Online Text Editor - Create, Edit, Share and Save Text Files

Loading…
Prāta ūberrima flōribus teguntur
cum vēr imperat ut virēscat omne
et sōlēs calidās bonāsque lūcēs
dant herbīs animālibusque grātīs.
–At cum nūbila contegunt serēnum
caelum clam cinerāceō colōre,
et silvās hiemālis aura perflat,
tunc herbae pereunt, caduntque flōrēs,
lūx sōlis moritur, calor recēdit.
Nam nātūra gubernat ūna tōtum
mundum perpetuā gravīque lēge:
"Numquam rēs erit ūlla sempiterna,
fīnem semper habēre erit necesse".
Haec verba accipe vēra mī Catulle:
necnōn noster amor perīre dēbet,
quī quondam nituit nitōre clārō
nunc autem tenebrīs viēscit ātrīs.
Ergō dēsine amāre amōre fractō,
nōlī ōdisse libīdinēs migrantēs,
nē sīs excruciātus appetītū.
Et cum marcida planta nōn recrēscat,
nōbīs sunt aliae novae petendae.
Nunc cūrā ut valeās Catulle noster,
flōrēs Lesbia iam novōs requīrit.